Prizren
Pas publikimit në medie për kallëzimin penal ndaj kryetarit Mytaher Haskuka dhe katër zyrtarëve të komunës së Prizrenit nga ana e AAK-së dega në Prizren, drejtori i Administratës Publike në Komunën e Prizrenit, Osman Hajdari, në llogarinë e tij në Facebook, ka dalë me një reagim duke thënë me tjerash se rivalëve politikë u pengon suksesi i qeverisjes komunale në Prizren, dhe se pak para hapjes së shërbimit të vetëm në Kosovë dhe të rrallit në rajon, ONE-STOP SHOP, marrin iniciativa për akuza të pabaza kundrejt udhëheqjes komunale, ekskluzivisht kundër tij, pa asnjë bazë ligjore.
Reagimi i plotë i Osman Hajdarit, drejtor i Administratës
Qytetarë të nderuar,
Si duket, rivalëve politikë u pengon suksesi i qeverisjes komunale në Prizren, ekskluzivisht ai i departamentit të administratës, ku me angazhimin dhe përpjekje të mëdha janë bërë ndryshime si asjnëherë më parë në sistemin e adminstratës, infrastrukturës në qendër dhe terren për një kohë shumë të shkurtë, dhe pak para hapjes së shërbimit të vetëm në Kosovë dhe të rrallit në rajon, one-stop shop, marrin inciativa për akuza të pabaza kundrejt udheheqjes komunale ekskluzivisht kunder meje, ku në një kallzim penal, përvec të tjerëve, përmendet emri im, pa asnjë bazë ligjore-pa asnje element qe përfshin kompetencat e mija.
Për opinionin e gjërë, dua t’u bëj me dije se për rastin në fjalë, subjekti i AAK-së ka bërë një aktpadi ndaj qeverisë komunale për gjoja shkëmbimin e pronës komunale më atë private-bëhet fjalë për një parcelë kadastrale e cila si e tillë është marrë vendim në gjykatë, dhe në asnjë rast nuk është me procedura të kompetencës së establishmentit komunal, aq më pak, në domenin e Drejtorisë së Administratës.
Subjekti në fjalë, në këtë rast AAK, përfshirë edhe subjektet tjera në të kaluarën, sa i përket Drejtorisë së Administratës, sikur nisen nga vetvetja për interferimet në rastet e ndryshme që mund t’i kenë bërë në të kaluarën; e për me keq, ata i pengon edhe suksesi i administratës së qeverisjes aktuale, e që sa ishin ata, projektet dhe zhvillimi i administratës ka vendnumruar.
Me këtë rast, ia bëj me dije AAK-së dhe autorëve të publikimit të këtij lajmi mbi një kallzim penal ende të pavërtetuar dhe aspak të bazuar se ne nuk do të rrimë duarkryq, dhe se konform ligjeve do të ngrehim padi për shpifje dhe dëmtim të imazhit; kësisoj t’i japim fund opozitarizmit me aktakuza të pabazuara ligjërisht dhe të motivuara politikisht.
Me rrespekt,
Osman Hajdari,
Drejtori i Administratës
