Ashtu si edhe kishte paralajmëruar, Lëvizja Vetëvendosje sot ka dorëzuar në Gjykatën Supreme ankesën ndaj vendimit të PZAP-së për moslejimin e numërimit të të gjitha pakove me fletëvotime nga bashkatdhetarët. Njoftimin e ka bërë Adnan Rrustemi, anëtar i KQZ-së nga Lëvizja Vetëvendosje.
“Sot Lëvizja VETËVENDOSJE! dorëzoi në Gjykatën Supreme ankesën me qëllim lejimin e numërimit të të gjitha pakove me fletëvotime nga bashkatdhetarët tanë si dhe hedhjen poshtë të vendimit të PAZP-së.
Presim që në afat sa më të shpejtë Gjykata Supreme të marrë vendim duke ia mundësuar realizimin e të drejtës për të zgjedhur dhe numërimin e fletëvotimeve të qytetarëve tanë me banim jashtë Kosovës.
Rikujtojmë edhe njëherë se pakot me fletëvotime janë dërguar brenda afateve kohore nga bashkatdhetarët dhe si të tilla ato duhet të numërohen dhe të bëhen pjesë e rezultatit final të zgjedhjeve në Republikën e Kosovës.”
