Kryetari i Komunës së Prizrenit, Mytaher Haskuka, ka njoftuar se komuna e Prizrenit ka anuluar të gjitha aktivitetet inauguruese për ditën e sotme dhe se është përqendruar në ofrimin e ndihmës për qytetet e dëmtuara në Shqipëri. Në njoftimin e bërë, i pari i Prizrenit ka ngushëlluar familjarët e viktimave të tërmetit të sotëm.
“Për shkak të tërmetit në Shqipëri, që ka shkaktuar viktima e të lënduar dhe dridhjet e të cilit u ndjenë edhe këtu në Kosovë, Komuna e Prizrenit sot i ka anuluar të gjitha aktivitetet e saja inaguruese dhe në konsultim me Drejtorinë e Emergjencës e të Sigurisë dhe drejtoritë e tjera përkatëse, përqëndrimi është kthyer në ofrimin e ndihmës për qytetet e dëmtuara.
Për këtë jemi në kontakt të vazhdueshëm me komunat e prekura nga tërmeti në Shqipëri dhe jemi në gatishmëri për të ofruar mbështetjen tonë.
Ngushëllime për familjarët e viktimave dhe shërim të shpejt për të lënduarit. Bashkëndjejmë dhimbjet e tyre.”
